منوج سنہاہَن کوٚر امیرا کدل فٹ برجُک افتتاح۔
جموں و کشمیرٕکۍ لیفٹیننٹ گورنر منوج سنہاہَن کوٚر بوموارِ دۄہ بحال کرنہٕ آمٕتۍ پرٛٲنۍ امیرہ کدل فٹ برجُک افتتاح۔ اَمہِ موقعَس پٮ۪ٹھ ٲسۍ ایم ایل اے لال چوک احسان پردیسی، ڈویژنل کمشنر کشمیر انشول گرگ، ڈِسٹرکٹ مجسٹریٹ سری نگر اکشے لبرو تہٕ باقٕے سینئر سول تہٕ پولیس اہلکار موجود۔ لیفٹیننٹ گورنرَن ووٚن میڈیاہَس زِ: ‘سمارٹ سٹی پروجیکٹَس تحت چھُ امیرا کدال فٹ برج، یُس شہرُک اکھ واریاہ پرٛون کٔدٕل چھُ، چھُ بحال کرنہٕ آمُت تہٕ از چھُ لوٗکَن باپتھ وقف کرنہٕ آمُت’۔
تٔمۍ ووٚن: ‘یہٕ کٔدل، ییٚمچ بحٲلی ہٕنٛز کٲم ٲس 2023 منٛز کرنہٕ آمٕژ، چُھ مقٲمی ورثہٕ تہٕ ثقافتس جدید شہری ڈیزائنس سۭتۍ جوڑان۔’
تٔمۍ ووٚن زِ اَمہِ سۭتۍ گَژھِ شہرَس تہٕ سرینگرَس درمیان پرٛون رٲبطہٕ بَحال۔
سری نگر سمارٹ سٹی پروجیکٹس تحت 7.17 کرور رۄپیہِ ہٕنٛز لاگتہٕ سۭتۍ بناونہٕ آمُت، فن تہٕ دستکٲری ہٕنٛز یہِ شاندار تہٕ نایاب مثال کَرِ پیدل چلنے والٮ۪ن ہٕنٛز حفاظت تہٕ رسٲیی بہتر۔