جموں و کشمیرَس منٛز شیٖن پیٚنہٕ کِنۍ شری ماتا ویشنو دیوی مندرٕچ یاترا منسوخ۔
جموں و کشمیر کِس ریاسی ضِلعہٕ کِس کٹرا قصبہٕ کِس تریکوٹا پہاڑَن منٛز واقعہٕ شری ماتا ویشنو دیوی مندرٕچ یاترا چھِ شیٖن پیٚنہٕ کِنہِ رُکاونہٕ آمٕژ۔
حکامَو ووٚن زِ موسمُک گۄڈنیُک شیٖن پیوٚو ویشنو دیوی پہاڑَن منٛز، ییٚلہِ زَن کٹرا قصبہٕ کٮ۪ن مٲدٲنی علاقَن منٛز آو روٗد درٕج کرنہٕ۔ تِمَو ووٚن زِ خراب موسمی حالاتن سۭتۍ چھِ بھونَس تام ہیلی کاپٹر خٕدمات تہِ مُتٲثِر گٔمٕتۍ۔
تِمَو ووٚن زِ یاترا آیہِ جُمعہ دۄہ صُبحٲے کٹرا بیس کیمپ پٮ۪ٹھٕ رُکاونہٕ، تہٕ بیس کیمپ پٮ۪ٹھٕ بھون کُن گژھنُک اجازت اوسُکھ نہٕ دِنہٕ۔
حکامَو ووٚن ووٚن زِ یاترا بیٚیہِ شُروٗع کرنَس مُتعلِق فٲصلہٕ یِیہِ موسمٕچ ایڈوائزری تہٕ موجودٕ موسمی صورتحالٕچ روشنی منٛز کرنہٕ۔
یہِ چھُ قٲبلہِ ذِکر زِ ییٚمہِ رٮ۪تہٕ وُنیُک تام چھِ تقریباً 4.3 لَچھ یاتریو شری ماتا ویشنو دیوی یاترا انجام دِژمٕژ۔ اہلِکارَن مُطٲبِق چھِ روزانہٕ 18,000 پیٹھٕ 22,000 یاتری امہِ مُقدس یاترا سۭتۍ فٲیدٕ تُلان۔