جموں و کشمیر ایل جی سُنٛڈ جعلی دستخطی کیس: مُلزِمن خلاف چارج شیٹ درٕج۔

اکنامکس آفینس وِنگ (ای او ڈبلیو) کرٛایِم برانچَن چُھ جموں و کشمیرٕکۍ لیفٹیننٹ گورنر سٕنٛدِ مُبیعنہٕ طور جعلی دستخط کرنہٕ کِس معاملَس منٛز أکِس شخٕصَس خلاف چارج شیٹ درٕج کٔرمٕژ۔

ایجنسی ہٕنٛدۍ ترجُمانَن ووٚن زِ پلوامہ ضِلعہٕ کِس أکِس روزَن وٲلِس ثقلکین مشتاق ڈارَس خٕلاف آو انڈین پینل کوڈ (آے پی سی) کِس مُتعلقہٕ دفعاتن تحت سرینگر سب جج عدالتَس منٛز چارج شیٹ درٕج کرنہٕ۔

ترجمانَس مُطٲبِق چھُ یہِ مقدمہٕ أکِس جعلی تحریری حُکمَس سۭتۍ تعلُق تھاوان یُس مبینہ طور اننت ناگ کِس سینئر سپرنٹنڈنٹ آف پولیسس (ایس ایس پی) سوزنہٕ اوس آمُت۔ سوزن وٲلۍ اوس پنُن پان مرکزی زیر انتظام علاقہٕ جموں و کشمیرُک لیفٹیننٹ گورنر سٕنٛدِ پٲٹھۍ پیش کوٚرمُت۔ تِمَو ووٚن زِ یہِ چِٹھۍ ٲس أکِس نقلی سرکٲرۍ لیٹر ہیڈس پٮ۪ٹھ تیار کرنہٕ آمٕژ تہٕ اَتھ پٮ۪ٹھ اوس لیفٹیننٹ گورنر سُنٛد جعلی دستخط۔

ترجمانَن ووٚن زِ امہِ چِٹھہِ ہُنٛد مقصد اوس اننت ناگ ضِلعہٕ پولیس انتظامیہٕچ کٲم غٲر قونوٗنی طور اثر انداز کرٕنۍ۔