اننت ناگَس منٛز گوٚو ٹیریٹوریل آرمی جوان لاپتہ، بٔڑِس پٲمانس پٮ۪ٹھ چھےٚ تلٲشی جٲری۔

جنوبی کشمیر کِس اننت ناگ ضلعہٕ کِس شانگس علاقس منٛز گوٚو ٹیریٹوریل آرمی ہُنٛد اکھ جوان لاپتہ۔ فوجٕچ چنار کورَن ووٚن بۄدوارِ دۄہ صُبحٲے ‘ایکس’ پٮ۪ٹھ أکِس پوسٹَس منٛز زِ "انٹلیجنس اطلاعاتَن پٮ۪ٹھ کٲم کٔرِتھ کٔر فوجن جموں و کشمیر پولیس تہٕ باقی ایجنسیَن سۭتۍ مِلِتھ 8 اکتوبر کوکرناگ کِس کازون جنگلس منٛز دہشت گردی خٕلاف مُشترکہٕ آپریشن”۔ تٔمۍ ووٚن زِ ٹیریٹوریل آرمی ہُنٛد اکھ جوان لاپتہ گژھنٕچ خبرَن ہٕنٛدِس تناظرس منٛز روٗز یہِ آپریشن پوٗرٕ رٲژ جٲری۔ پوسٹَن ووٚن زِ علاقَس منٛز چھِ بٔڑِس پیمانَس پٮ۪ٹھ بچاؤ تہٕ تلاشی آپریشن جٲری۔
خبرو مُطٲبِق ٲسہِ ٹیریٹوریل آرمی ہٕنٛدِ زٕ اہلکار بۄموارِ دۄہ دُپہرَس جنوٗبی اننت ناگ ضِلعہٕ کِس اترسو شانگس علاقس منٛز گٔمٕتہِ ییٚتہِ تِم دہشت گردن سۭتہِ بٗتھہِ بٗتھہِ آیہِ ییٚلہِ اکھ جوان پننِس یونٹَس منٛز واپس یِنَس منٛز کامیاب گوٚو تہٕ کوٚرُکھ یہِ واقعہٕ بیان۔