ایران ترٛاوِ نہٕ زانٛہہ تہِ ہتھیار : خامنہ ای تہران

ایرانی سپریم لیڈر علی خامنہ ای یَن دِیُت امریکی صدر ڈونالڈ ٹرمپ سٕنٛدِس ہتھیار تراونٕکِس دھمکی آمیز مطالبَس جواب تہٕ ووٚنُن زِ ایران کرِ نہٕ زانٛہہ تہِ ہتھیار تراوٕنۍ۔ ٹرمپن اوس ووٚنمُت زِ اگر نہٕ ایران غٲر مشروط ہتھیار تراوِ تہٕ ایرانی سپریم لیڈر ہیکہِ مارنہٕ یِتھ۔ اَمہِ کِس جوابَس منٛز ووٚن سپریم لیڈرَن زِ ‘اگر امریکہ پننِس اتحادی سٕنٛدِ مدتہٕ خٲطرٕ کانٛہہ مُداخلت کَرِ تیٚلہِ پیٚیہِ أمِس ناقابل تلافی نۄقصانُک سامنہٕ۔’ ایرانی سپریم لیڈرَن کوٚر یِم بیان ایران-اسرائیل جنگ کِس شیٚیِمہِ دۄہ تقریرَس منٛز۔ ایرانی سرکٲری ٹیلی ویژنَس پٮ۪ٹھ نشر گژھَن وٲلِس تقریرَس منٛز ووٚن خامنہ ای یَن زِ سون قوم کَرِ نہٕ زانٛہہ تہِ ہتھیار ترٛٲوِتھ۔ تٔمۍ کوٚر صدر ٹرمپ سُنٛد الٹی میٹم ناقابل قبول، یہٕ ونان زِ ‘امریکہس پزِ یہٕ زانُن زِ کُنہٕ تہٕ فوجی مداخلتہٕ سۭتۍ گژھِ بلاشبہ اتھ ناقابل تلافی نۄقصان۔’ ایرانی سپریم لیڈر علی خامنہ ای چھُ 1989 پٮ۪ٹھٕ اقتدارس منٛز تہٕ چھُ ایرانَس منٛز تمام ریاستی معاملاتَن ہُنٛد ٲخری نگران ۔