جموں و کشمیرس منٛز چھےٚ ساروٕے کھۄتہٕ سستہٕ بجلی: منوج سنہا

سرینگر: لیفٹیننٹ گورنر منوج سنہاہَن ووٚن زِ جموں و کشمیر کٮ۪ن لوٗکَن چھِ مُلکٕک باقی ریاستَن تہٕ مرکزی زیر انتظام علاقَن ہٕنٛدِس مُقابلَس منٛز سستہٕ بجلی میلان۔

تٔمۍ ووٚن زِ مرکزٕک فعال تعاونَس سۭتۍ چھِ انتظامیہ جموں و کشمیر "قرضٕچ میراث” نِش نٮ۪بر نیرنس تہٕ اتھ پائیدار اقتصٲدی وتہِ پٮ۪ٹھ ترٛاونس منٛز کامیاب۔

لیفٹیننٹ گورنرَن ووٚن یہِ کَتھ ژٔنٛدٕروارِ دۄہ ییٚتہِ جیٖل دل کِس بٔٹِھس پٮ۪ٹھ شیر کشمیر انٹرنیشنل کانفرنس سینٹرَس منٛز أکِس پریس کانفرنسَس منٛز خطاب کران۔