کُلگامَس منٛز این ڈی پی ایس ایکٹَس تحت 15 لَچھ رۄپیہِ ہُنٛد جایداد ضبط کرنہٕ: پُلیٖس

نشاور ادوِیات چہِ اسمگلنگ خٕلاف أکِس بٔڑِس کریک ڈاوُنَس منٛز کوٚر کُلگام پولیسَن این ڈی پی ایس ایکٹَس تحت أکِس مُبینہٕ ڈرگ ڈیلر سُنٛد تقریٖباً 1.5 کرور رۄپیہِ ہُنٛد غٲر منقولہ جائیداد ضبط۔پُلسہٕ کہِ ترجمانَن ووٚن زِ کُلگام پولیسَن چھُ این ڈی پی ایس ایکٹَس تحت قاضی گُنٛڈ کِس منیگام گامَس منٛز أکِس بدنام مُبینہٕ منشیات فروش سُنٛد تقریباً 1.5 کرور رۄپیہِ ہُنٛد غٲر منقولہ جایداد ضبط کوٚرمُت۔تٔمۍ ووٚن زِ ضبط کرنہٕ آمٕتہِ جایدادَس منٛز چھِ 6 دُکان، 5 گودام، اکھ ٹین شیڈ تہٕ اکھ چبوُر شٲمِل، یُس منیگامَس منٛز واقعہٕ چھُ، یُس نٔو پورہ قاضی گنٛڈُک روزَن وٲلہِ غلام احمد کھانڈے سُنٛد نیٚچُو، بدنام ڈرگ ڈیلر محمد اشرف کھانڈے سُنٛد ملکیت چھُ۔تٔمۍ ووٚن زِ یہِ کاروٲیی آیہِ این ڈی پی ایس ایکٹ کِس دفعہٕ 68-F تحت قونوٗنی رسمی کاروٲیی پوٗرٕ کرنہٕ پتہٕ کرنہٕ۔پُلسہٕ ترجمانَن ووٚن ووٚن زِ ضبط کرنہٕ آمٕژ جائیداد ٲس غٲر قونوٗنی منشیاتٕچ اسمگلنگ ذٔریعہٕ حٲصِل کٔرمٕژ رقم ثٲبِت گٔمٕژ، تہٕ مُلزِم اوسُکھ براہ راست منشیاتٕچ غیر قانونی تجارت کٮ۪ن سرگرمیَن سۭتۍ وابستہٕ لبنہٕ آمُت۔