SKIMS تہٕ GMC یَس منٛز کینسر کین معاملن منٛز نمایاں اضافہٕ، 2025 منٛز گٔیہٕ کُل 4,529 نٔوۍ مریض درٕج
جموں و کشمیرس منٛز کینسر کین معاملن منٛز مسلسل اضافہٕ تہٕ ریاستی کینسر ادارن منٛز عملہٕ چہِ کٔمی مُتعلِق أکِس سوالُک جواب دِوان دِیُت حکوٗمتَن اسمبلی منٛز واضح زِ جموں و کشمیر دۄشوٕنی علاقن منٛز قٲیم کرنہٕ آمٕتۍ ریاستی کینسر انسٹی ٹیوٹ چھِ وارٕ وارٕ پوٗرٕ پٲٹھۍ کٲم کرنہٕ یِوان تہٕ ضروٗری عملہٕ باقٲعدٕ تعیناتی خٲطرٕ چھِ اقدامات جٲری۔ ایم ایل اے شیخ احسن احمد پردیسی یَن اوس پننِس سوالَس منٛز اِشارٕ کوٚرمُت زِ سٹیٹ کینسر انسٹی ٹیوٹ اوسُکھ ضروٗری طبی، پیرا میڈیکل تہٕ تکنیکی عملہٕ بناونہٕ ورٲے قٲیِم کرنہٕ آمُت، ییٚمہِ کِنۍ مریضَن شٔدیٖد مُشکِلات تہٕ علاجَس منٛز ژیر گٔیہِ۔ جوابَس منٛز ووٚن محکمہٕ صحتَن زِ سٹیٹ کینسر انسٹی ٹیوٹ جموں چھُ 4 فروری 2023 پٮ۪ٹھٕ وارٕ وارٕ کٲم کرنہٕ آمُت، تہٕ حکوٗمتَن اوس گۄڈَے 5 مئی 2021 کِس حُکمَس ذٔریعہٕ ضروٗری عملٕچ منظوٗری دِژمٕژ۔ یِتھے پٲٹھۍ آو سکیمز سوراہس منٛز 100 بیڈ قٲیم کرنہٕ آمُت سٹیٹ کینسر انسٹی ٹیوٹ 5 دسمبر 2020 مرکزی فنڈنگس تحت شروع کرنہٕ۔