عمر عبداللہَ ہن کوٚر شُپینَس منٛز غٲر مقٲمی مزوٗر سٕنٛدِس قتلَس پٮ۪ٹھ دۄکھُک اِظہار۔

وزیر اعلیٰ عمر عبداللہَن چھُ جنوٗبی کشمیر کِس شوپیاں ضلعَس منٛز دہشت گردَن ہٕنٛدِ ذٔریعہٕ أکِس غٲر مقٲمی سٕنٛدِس قتلَس پٮ۪ٹھ دۄکھُک اِظہار کوٚرمُت تہٕ أمۍ سٕنٛدِس غمگیٖن عیالَس سۭتۍ تعزیت پیش کٔرمٕژ۔ تٔمۍ ووٚن زِ یِتھۍ حملہٕ چھِ گھناؤنا تہٕ یِمَن ہٕنٛز مذمت گژھِ سخت ترین لفٕظَن منٛز کرنہٕ یِنۍ۔
ذٔرایعو مُطٲبِق گٔیہِ کینٛہہ غٲر مقٲمی بسکیٖن در جُمعہ دۄہ صُبحٲے وندنا ملہورا گامَس منٛز مکی ژٹنہٕ خٲطرٕ کھہَس منٛز ییٚلہِ دہشت گردَو بگل پورہ بِہار کِس روزَن وٲلِس اشوک کمار چوہانَس پٮ۪ٹھ نزدیٖکی گولہِ چلٲوِ، ییٚمہِ کِس نٔتیٖجس منٛز سُہ مارٕ گوٚو۔
بَٹہٕ وارِ دۄہ صُبحٲے اَتھ واقعَس پٮ۪ٹھ دۄکھُک اِظہار کٔرِتھ ووٚن عمر عبداللہَن ‘ایکس’ پٮ۪ٹھ أکِس پوسٹَس منٛز: "جنوٗبی کشمیرَس منٛز دہشت گردَن ہٕنٛدِ دٔسۍ اشوک چوہان سٕنٛدِ مرنٕچ خبر بوزِتھ چھُ سٮ۪ٹھاہ افسوس۔” تٔمۍ ووٚن زِ یِتھۍ حملہٕ چھِ گھناؤنا تہٕ یِمَن ہٕنٛز مذمت گژھِ سخت ترین لفٕظَن منٛز کرنہٕ یِنۍ۔ تٔمۍ ووٚن پوسٹَس منٛز زِ "بہٕ چھُس غمزدہ عیالَس تہٕ تِہنٛدٮ۪ن باقٕے رِشتہٕ دارَن سۭتۍ تعزیت پیش کران”