راجیہ سبھا گٔیہِ اڈانی رُشوَت خوری معاملَس منٛز ہنگامہٕ کِنۍ دُپہرَس تام مُلتوی۔

کانگریس تہٕ باقی اپوزیشن جماعتن ہٕنٛدٮ۪و رُکنو کوٚر ژٔنٛدٕروارِ دۄہ صنعت کار گوتم اڈانی سۭتۍ مُبینہٕ رشوت خوری کِس معاملس پٮ۪ٹھ راجیہ سبھایہ منٛز تمام قانون سٲزی ہٕنٛدِس کاروبارس پٮ۪ٹھ روک لگاونُک مطالبہٕ، مگر چیرمینَن کوٚر یہِ رَد، ییٚمہِ پتہٕ حزب اختلاف کہِ ہنگامہٕ کہِ وجہہ سۭتۍ ایوان 15 منٹَن خٲطرٕ دُپہرَس 12.45 بجے تام ملتوی کرنہٕ آو۔
پارلیمنٹ کِس سرمٲیی اجلاسٕک گۄڈٕنِکہِ دۄہ ووٚن چیئرمین جگدیپ دھنکھرَن زِ 13 ارکانَو چھِ اڈانی رشوت خوری کیسَس سۭتۍ مُختٔلِف معاملَن پٮ۪ٹھ التوا نوٹس دِیُتمُت۔ یِمَن منٛز چھُ اڈانی معاملَس پٮ۪ٹھ حزب اختلاف کِس رہنُما ملیکارجن کھڑگے سُنٛد نوٹس شٲمِل۔ تٔمۍ ووٚن زِ 8 دسمبر 2022 اوس تٔمۍ گۄڈَے رول 267 ہَس مُتعلِق تفصیٖل سان تبصرٕ کوٚرمُت۔ تٔمۍ ووٚن زِ یِم نوٹس ٲسۍ نہٕ قونوٗنَن مُطٲبِق تہٕ چھِنہٕ قبول کرنہٕ آمٕتۍ۔ "أسۍ کَرِ ٲییٖن اپناونٕکہِ 75 ؤرۍ یَن ہُنٛد جشن۔ اسہِ چھِ تخلیقی کٲم کٔرِتھ لوٗکَن ہٕنٛزٕ خواہشات پوٗرٕ کرٕنۍ۔