وزیر اعلیٰ سٕنٛز مرکزی وزیرس سۭتۍ ملاقات، جموں و کشمیرس منٛز جل جیون مشن تیز کرنس پیٹھ رضامندی ظٲہر۔

جموں و کشمیرٕکۍ وزیر اعلیٰ ہن کوٚر جُمعہ دۄہ نیہِ دِلہِ منٛز مرکزی ؤزیٖر جل شکتی سی آر پٹیلَس سۭتۍ ملاقات، یَتھ دوران جموں و کشمیرَس منٛز جل جیون مِشنہٕ کِس نفاذَس سۭتۍ وابستہٕ اہم مسلَن پٮ۪ٹھ تفصیلی بَحَث کرنہٕ آیہِ۔
میٹنگہِ دوران دِیُت وزیر اعلیٰ ہن مرکٔزی حکوٗمتَس جلدٕی زیر التوا مرکٔزی فنڈ جٲری کرنہٕ کِس ضرورتَس پٮ۪ٹھ زور تاکہ پوٗرٕ کامہِ ہٕنٛز ادٲیگی ییہِ کرنہٕ تہٕ مُختٔلِف وجہو کِنۍ رُکاونہٕ آمٕژٕ سکیمہٕ یِن دُبارٕ شُروٗع کرنہٕ، یِمَو منٛز واریاہ پوٗرٕ گژھنَس قریب چھےٚ۔
وزیر اعلیٰ ہن دیُت مرکزی وزیرس یٔقیٖن زِ جموں و کشمیر حکوٗمت بناوِ جل جیون مِشنَس تحت تمام منصوٗبَن خٲطرٕ بروقت نفاذ، سختی سان نگرٲنی تہٕ مُقرر نِشانہٕ حٲصِل کرُن یٔقیٖنی۔ گٲمی علاقَن منٛز "ہر گھر جلُک” مقصد حٲصِل کرنُک عزم دُبارٕ تصدیق کران وون تٔمۍ زِ مرکٔزی حکوٗمت کہِ مسلسل مددٕ سۭتۍ یِیہِ یہِ مشن کامیٲبی سان پوٗرٕ کرنہٕ۔