گورکھ نگر، جۅمِس منٛز شَکاوَر ڈرون برآمد ۔

جموں کِس گورکھ نگر علاقَس منٛز گٔیہِ خوف تَمہِ وِزِ ییٚلہِ مقٲمی بسکیٖنَو أکِس نالہِ نزدیٖک اکھ شَکاوَر ڈرون ہیوٗ چیز وُچھ۔ یہِ واقعہٕ گوٚو بَٹہٕ وارِ دۄہ صُبحٲے ، ییٚمہِ پتہٕ علاقَس منٛز حِفٲظتی الرٹ جٲری کرنہٕ تہٕ واریٛاہ پولیس ٹیمہٕ وٲتہِ واقعہٕ۔

ذرایعو مُطٲبِق دِژ مقٲمی بسکیٖنَو نالہِ نِش شَکاوَر چیٖز وُچھنہٕ پتہٕ فوراً باغ بہو پُلسہٕ تھانس اِطلاع ۔ رپورٹ موصول گژھنہٕ پتہٕ وٲتۍ پُلیٖس ٹیٖم علاقَس منٛز، پوٗرٕ جایہِ گیرٕ کٔرِکھ تہٕ نِیُکھ شَکاوَر ڈرون محفوٗظ حِراستَس منٛز۔

پُلسہٕ مُطٲبِق چھُ برآمد کرنہٕ آمُت چیٖز ماہرینَن تفصیٖلی معٲینہٕ باپتھ حوالہٕ کرنہٕ آمُت تاکہ امیُک قٕسم، ساخت تہٕ مُمکِنہٕ بُنیاد معلوم کرنہٕ ییہِ۔ حکامَو ووٚن زِ یہِ چھُ گۄڈٕ ڈرون ہیوٗ چیز باسان۔ تاہم، حتمی نتیجہٕ ہیکو صرف تکنیکی معائنہٕ پتہٕ کٔرتھ۔

پولیسَن ووٚن بیٚیِہ زِ معاملٕچ سنگیدگی مدنظر تھٲوِتھ چھِ سیکورٹی ایجنسیَن تہِ اطلاع دِنہٕ آمٕژ، تہٕ علاقَس منٛز چھِ حِفٲظتی گشتَس منٛز ہُریر کرنہٕ آمُت۔