*لوکن ہندس فٲصلس گژھہِ احترام کرنہ ین: فاروق عبداللہ انتخابی نتائجن پیٹھ*

نیشنل کانفرنسٕک (این سی) صدر فاروق عبداللہ ہَن ووٚن بوموارِ دۄہ زِ ژورَن ریاستَن تہٕ أکِس مرکزی زیر انتظام علاقَس منٛز حالٕے اعلان کرنہٕ آمٕتۍ اِنتِخابی نٔتیٖجن منٛز گژھِ لوٗکَن ہٕنٛدِس فٲصلَس احترام کرنہٕ یُن، یہِ وۄمید ظٲہر کٔرِتھ زِ نٔوۍ حکومتہٕ کَرن عوامٕچ فلاح و بہبودٕ خٲطرٕ کٲم۔ خبرو مُطٲبِق وسطی کشمیر کِس ضلع بڈگام کِس چرار شریفَس منٛز نامہ نگارن سۭتۍ کتھ باتھ کران عبداللہ ہَن وون زِ لوٗکَن ہُنٛد فٲصلہٕ چھُ پرٛٮ۪تھ کٲنٛسہِ برٛونٛہہ کُن۔ ‘نٔوۍ حکومتہٕ آیہِ آمٕژ۔ اللہ تعالیٰ کرِ تِمن لوکن ہٕنز فلاح و بہبودٕ خٲطرٕ کٲم کرنچ رہنمایی ۔ یہِ قوم چھُ اسہِ سارِنٕے ہُنٛد ، تہٕ یہِ گژھِ خیال تھاونہٕ یُن یُتھ پرٮ۪تھ کانٛہہ ترقی کرِ۔’ یِنہٕ وٲلِس پنچایت اِنتِخابس مُتعلِق ووٚن عبداللہ زِ این سی چھُ حصہٕ نِنہٕ خٲطرٕ تیار تہٕ چھُ سرکٲرِ اطلاعَس پیٛاران۔ تٔمۍ ووٚن پنچایت جموٗرِیَتُک اکھ لٲزمی ستون قرار دِتھ زِ تِم چھِ زمینی سطحس پٮ۪ٹھ ترقی قٲبل بناوان.