منوج سنہاہَن کوٚر تجرُبہٕ کار صنعت کار رَتن ٹاٹا سٕنٛدِس مرنَس پٮ۪ٹھ تعزیت۔

جموں و کشمیرٕک لیفٹیننٹ گورنر منوج سنہاہَن چھُ مشہوٗر صنعت کار رتن ٹاٹا سٕنٛدِس مرنَس پٮ۪ٹھ تعزیت کوٚرمُت۔ ٹاٹا گروپُک سٲبقہٕ چیئرمین رَتن ٹاٹا گُزریٛوو راتھ رٲژ 86 ؤری وٲنٛسہِ منٛز مٗمبیی ہسپتالس منٛز۔
ایکس پٮ۪ٹھ أکِس پوسٹَس منٛز تٔمِس خراج تحسین پیش کران ووٚن لیفٹیننٹ گورنرَن زِ "شری رتن ٹاٹا جی سٕنٛدِ مرنٕچ خبر بوٗزِتھ چھُ سٮ۪ٹھاہ افسوس۔” تٔمۍ ووٚن زِ "سُہ اوس بلاشبہ حالیہ وقتن منٛز صنعت کٮ۪و ساروِی کھۄتہٕ زیادٕ بااثر لیڈرو منٛزٕ اکھ”۔ تٔمۍ ووٚن پوسٹَس منٛز زِ تِمَو تروو ہندوستٲنی معیشت، تجارت تہٕ صنعتَس پٮ۪ٹھ سٮ۪ٹھا اثر۔ منوج سنہاہَن کٔر پنٛنِس عیالَس، دوستَن تہٕ خۄش خواہَن تعزیت پیش۔