جموں و کشمیرَس منٛز فوڈ سیفٹی مُہمہِ منٛز آو 12,000 کِلو سڑمُت ماز ضبط:حکوٗمت

حکوٗمتَن کوٚر جمعہ دۄہ اسمبلی منٛز انکشاف زِ مالی ورۍ 2025-26 دوران گٔیہٕ جموں و کشمیرَس منٛز باسی تہٕ غیر محفوظ ماز تہٕ مازٕکۍ چیٖز کٕننٕکۍ واریاہ واقعہٕ، یِمَن خلاف فوڈ سیفٹی ڈیپارٹمنٹَن بٔڑِس پیمانَس پٮ۪ٹھ کاروٲیی کٔر۔
حکوٗمتَس مُطٲبِق آیہِ یِم واقعہٕ باقٲعدٕ نگرٲنی مُہِمَن دوران برونہہ کُن، ییٚمہِ پتہٕ تمام ضِلعن منٛز خصوٗصی نٲفِظ کرنٕچ مُہِم آیہِ چلاونہٕ۔
حکوٗمتَس مُطٲبِق آو دسمبر 2025 تام کُل 12,183.5 کِلوگرام باسی تہٕ غیر محفوظ ماز ضبط کٔرِتھ تباہ کرنہٕ، یُس تقریباً 2,919,060 رۄپیہِ مُلُک چھُ۔ اَتھ عرصَس دوران آیہِ 1,676 معٲینہٕ کرنہٕ تہٕ 144 نمونہٕ آیہِ جمع کرنہٕ۔ لیبارٹری رپورٹن منٛز چُھ ونٛنہٕ آمُت زِ 17 نمونہٕ ٲسۍ غیر محفوظ ییٚلہ زن اکھ نمونہٕ اوس غٲر معیٲری سمجھنہٕ آمُت۔
سارِوٕے کھۄتہٕ زِیٛادٕ مقدارس منٛز آو سرینگر تہٕ کُلگام ضِلعن منٛز ضبط کرنہٕ، ییٚلہِ زَن کُپواڑہ، گندر بل تہٕ اننت ناگ ضِلعن منٛز تہِ آیہِ اہم کاروٲیی کرنہٕ۔