مہاراشٹرا حکومت چھےٚ فضول خرچن منٛز شٲمِل: کانگریس

مہاراشٹر کانگریسَن چھُ بھارتیہ جنتا پارٹی (بی جے پی) تہٕ وزیر اعلیٰ ایکناتھ شندے سنٛز حکومتَس پٮ۪ٹھ فضول خرچہٕ کرنُک الزام لگوٚومُت۔
کانگریسَن چھُ حکومتَس پٮ۪ٹھ الزام لگوٚومُت زِ سُہ چھُ جلدٕی منٛز کرور رۄپیَن ہٕنٛدۍ ٹینڈر صاف کٔرِتھ "زِیٛادٕ کھۄتہٕ زِیٛادٕ لوٗٹنٕچ جلدٕ” کران۔
کانگریسٕکۍ ترجُمان اتُل لوندھیَن کوٚر برٛسوارِ دۄہ رٲژ میڈیا بیانَس منٛز الزام زِ امہِ سۭتۍ گوٚو تٔمۍ سُنٛد حکومتہٕ نٮ۪بر نیرنہٕ برٛونٛہہ منافعَس منٛز تٔمۍ سُنٛد حصہٕ یٔقیٖنی۔ تٔمۍ ووٚن زِ رِیاستی کابینہِ چھُ ڈیجیٹل پلیٹ فارمَن باپتھ اِشتِہارن خٲطرٕ 90 کرور رۄپیَن ہُنٛد ٹینڈر جٲری کوٚرمُت، تہٕ حکم دِیُت زِ یہِ رقم گژھِ پانٛژن دۄہَن انٛدر انٛدر خرچ کرنہٕ یِنۍ۔ اَمہِ علاوٕ چھِ کابینہِ ایس ایم ایس کہِ ذٔریعہٕ حکوٗمتٕکہِ فٲصلہٕ عوامَس تام واتناونہٕ خٲطرٕ 23 کرور رۄپیَن ہُنٛد بیٛاکھ ٹینڈر منظوٗری دِژمٕژ۔
"عوٲمی فنڈَن ہٕنٛدِس فضول خرچَس” پٮ۪ٹھ سخت تنقید کران ووٚن مسٹر لونڈھے یَن زِ ریاستَس چھُ 8 لچھ کرور رۄپیہِ کھۄتہٕ زِیٛادٕ قرضہٕ مگر حکومت چھِ کمیشن حٲصِل کرنہٕ باپتھ لاپرواہ ٹینڈر جٲری کران۔