ووٹن ہٕنٛزِ گرنٛدِ ہُنٛد تٲریٖخ آو بی جے پی کِس وننس پٮ۪ٹھ تبدیل کرنہٕ: محبوبہ مفتی

پی ڈی پی صدر محبوبہ مفتی یَن چھُ الزام لگوٚومُت زِ الیکشن کمیشنَن چھُ بی جے پی کِس اشارَس پٮ۪ٹھ جموں و کشمیر اسمبلی انتخاباتَن باپتھ ووٹَن ہٕنٛز گنتی ہُنٛد تٲریخ تبدیل کوٚرمُت تہٕ ووٚنُن زِ الیکشن پینل چھُ سُہ کران یُس بی جے پی خٲطرٕ مُنٲسِب چھُ۔ جموں و کشمیرس منٛز لوک سبھا اِنتِخابس دوران تہِ بدلٲو الیکشن کمیشنَن غٲر ضروٗری طور پولنگ ہُنٛد تٲریٖخ۔محبوبہ مُفتیَن کوٚر الزام زِ فٲصلہٕ چھِ بی جے پی تہٕ اَمہِ کٮ۪ن پراکسی جماعتَن ہٕنٛدِ خواہشہِ مُطٲبِق نِنہٕ یِوان۔الیکشنَن دوران سینئر پولیس افسرَن ہٕنٛدِ تبادلہٕ تہٕ تعیناتُک حکم دِنہٕ پٮ۪ٹھ ووٚن پی ڈی پی سربراہَن زِ الیکشن کمیشن آف انڈیاہَس چھِ آزادانہٕ، منصفانہٕ تہٕ غٲر جانبدارانہٕ اِنتخٲبی عمل یقینی بناونہٕ خٲطرٕ زمینی سطحس پٮ۪ٹھ قدم تُلنٕچ ضروٗرت۔”أسۍ سٲری چھِ پَے زِ 1987 تھس منٛز کیٛاہ گوٚو، ییٚمہِ کِس نٔتیٖجس منٛز جموں و کشمیرٕچ صورتحال خراب گٔیہِ۔